ایک لاکھ پودے لگانے کا ہدف حاصل کیا جائے گا: رانا وحید شہزاد
’’نوجوان پاکستان کا مستقبل‘‘ کے عنوان سے تقریب منعقد کی جائے گی: صدر منہاج یوتھ لیگ
لاہور (9 اگست 2025) منہاج یوتھ لیگ کے زیراہتمام 12 اگست 2025 (منگل) سے مرکزی سیکرٹریٹ ماڈل ٹائون میں پودے لگا کر ملک گیر شجر کاری مہم کا آغاز کیا جائے گا۔ شجر کاری مہم 12 اگست سے5 ستمبر تک جاری رہے گی۔ 12 اگست کو یوم آزادی کے حوالے سے پرچم کشائی اور نوجوانوں کے عالمی دن کے موقع ’’نوجوان پاکستان کا مستقبل‘‘ کے عنوان سے تقریب بھی منعقد کی جائے گی جس میں ملک بھر کی یوتھ تنظیموں کے نمائندے شرکت کریں گے۔
مرکزی صدر منہاج یوتھ لیگ رانا وحید شہزاد نے شجر کاری مہم کی تیاریوں و انتظامات کے حوالے سے منعقدہ اجلاس میں خطاب کرتے ہوئے کہاکہ منہاج یوتھ لیگ کے زیراہتمام ماحولیاتی توازن کو برقرار رکھنے میں درختوں کی اہمیت و شجر کاری مہم کے سلسلے میں ملک کے تمام اضلاع میں تقاریب بھی منعقد کی جائیں گی۔ سیمینارز، واکس کے ذریعے عوام کو شجر کاری مہم میں شامل کیا جائے گا۔
انہوں نے مزید کہاکہ شجر کاری سے نہ صرف ماحولیاتی توازن برقرار رہتا ہے بلکہ یہ عمل صدقہ جاریہ بھی ہے۔ انہوں نے کہاکہ پاکستان گلوبل وارمنگ آنے والے ٹاپ تین ممالک میں شامل ہے۔انسانی فلاح و بہبود کیلئے پاکستان میں زیادہ سے زیادہ درخت لگانے اور جنگلات بڑھانے ہوں گے۔ شجر کاری مہم کے تحت ملک بھر میں ایک لاکھ پودے لگائے جائیں گے، درخت لگانا قومی فریضہ ہے ہر شہری کا کردار اہم ہوگا۔
تبصرہ